Verso il 25 aprile friulano

La nestre primevere di sanc e di libertât

Messaggero Veneto, 15 aprile 2014 

di Giannino Angeli 

Rivade la primevere dal 1945, o pensavin che par chê ore dut al fos finît di bielzà un an. Invezite, propit in chê volte, al Friûl i tocjà lotâ e paiâ un debit che la sô int no veve fat. E je stade dure contâ i muarts tai dîs che mieç mont al faseve fieste parcè che la pâs e jere tornade cun tant di bandieris sui barcons e concierts di cjampanis. La pâs e rivà ancje par nô daspò vê sopuartât un’altre passade di sassinaments. E fo cun nô ai prins di Mai. No nus pareve vêr podê lâ pes stradis di dì e di gnot e fermâsi a tabaiâ cence nissune pôre. O jerin tornâts a vivi dopo agnorums di baticûr che a segnarin la agunie de libertât e de democrazie. Cun nô, tes placis e pai borcs, i zovins dai façolets ros e verts de Garibaldi e de Osôf. Fieste par ducj. O cognosserin in chê volte la muse vere di chê schirie che ve il coragjo di frontâ i todescs e di resisti ae lôr prepotence (ancje dal disevot i fantats di Buie a faserin bati la lune ai austro-ungjarês). Par no dismenteâ chei moments, ogni an a Udin e in dute Italie, ai 25 di Avrîl, si fermisi un moment a pensâ a chei timps. Ognun al à il so fat di memoreâ, tal ben o tal mal. Ducj o sbassìn il cjaf in onôr dai muarts e di chei che, furtunâts lôr, le àn puartade fûr. La int e scombatè par vinci dongje dai siei fruts che a lerin in montagne, cambiant non par no fâsi cognossi. E ancje lì o cjatìn la olme furlane: «pai nestris fogolârs» a vevin scrit sui façolets. E podopo i nons pustiçs che a san di furlan fin te medole e di gjarnazie fuarte: Amôr, Balute, Barbe Livio, Barbe Toni, Bepo Stangje, Cunine, Felet, Furlan, Ganasse, Gjal, Jacum, Mufe, Pue, Vigji Curtìs, Saete, Saltel, Sclâf, Scroc, Tapon, Zuet, Vecjo. E cuissà trops che si puedin cjatâ sgarfant sui libris che a fevelin dai nestris partigjans... Ricuardìnju ducj, fasint presint che no je la stesse robe murî in combatiment opûr picjâts, di fan tai cjamps di concentrament o ben tes cjamaris a gas, sot torture o a tradiment par vie di une spie nostrane, par no dî di chei che a son stâts butâts vîfs intune buse. Cundut chel, o pensìn che ogni muart al merti il so requiem e il so perdon.