CUINTRISTORIE DAL NÛFCENT 1940-1950 - La seconde tragjedie mondiâl
Tantis bataiis intune grande tragjedie
Femine furlane tai agns daspò de vuere (par concession dal Archivi Tessaro di Buie, che o ringraziìn pe colaborazion)
I prins cinc agns a son chei trements de spiete, se si ju viôt cui voi di chei che a restin, ven a stâi lis feminis. La spiete e je simpri il lôr tragjic destin. A resistin, lis feminis. A lavorin par mantignî i fruts e i vecjos. In fabriche, te campagne, in famee. Ancje il cjamp di concentrament fassist di Gonârs al è plen di feminis, cui lôr vecjos e i lôr fruts. A son zingars, slovens e cravuats, tirâts dongje dopo la ocupazion di Lubiane, vitimis de pulizie etniche taliane. Nie di mangjâ ni di bevi. Une pagjine nere dal nestri Friûl, cuant che la polente, dineade, e vignive butade cun tristerie devant de rêt dal cjamp di concentrament, là che la man dai fruts no podeve rivâ a cjapâle sù. Par no contâ la vergogne dai bataions di cjamesis neris dal Cividât e dal Tumieç, che a violentin, a copin, a brusin i paîs in Slovenie e in Istrie. Ma stant che la Italie no à vût la sô Norimberghe, i nestris criminâi di vuere no son mai stâts punîts.
ALPIN, JO MAME_ Par fortune che nô furlans o podìn svantâsi di vê vût i alpins, che no àn mai amade la vuere, stant che il so pês al è simpri colât soredut su la lôr gobe. Come che a àn dimostrât a Paluce, cuant che bielzà pronts par partî pe Russie, cjamâts plui dai lôr mui, plens di marum e di avilizion, a viodin passâ dongje di lôr une compagnie in cjamese nere, che ju sbelee, ju incite a sei contents di lâ a murî pe Patrie. Ur monte sù la fote, a chei alpins, e poiâ il russac e fracâju di pachis al è stât dut un. A saran simpri lôr a colâ te nêf di Nikolaewka, ai 26 di Zenâr dal 1943. In tancj a son stâts salvâts des feminis russis, che ur àn dât di mangjà, tes lôr izbes. Int dure, i alpins, braurose. La caserme “Italia”, a Tarvis, e sarà la ultime a rindisi ai mucs, daspò dai 8 di Setembar. Tresinte alpins cuintri dutis lis colonis todescjis intropadis a Arnoldstein. E ancjemò une volte e je une femine a judâju, la Gjigje Picech, centraliniste de stazion publiche dal paîs, che e manten lis comunicazions, fintremai ae rese, dopo un scombatiment durat sîs oris. La prime partigjane femine de Resistence!
LA REPUBLICHE LIBARE DI CJARGNE_ E dopo di jê, tantis altris feminis a decidaran di scombati par difindi la libertât dal lôr popul. Come chês che a àn operât te Libare Republiche de Cjargne, une esperience durade dal Lui al Dicembar dal 1944, cul so altissim profîl di civiltât, pe difese de dignitât dal om, dal libar pinsîr, de scuele publiche, de nature e dal ambient, de libertât di peraule, di pinsîr e di stampe. Pe abolizion de pene di muart. 2.500 chilometris cuadrâts di libertât jenfri Friûl e Venit, 90 mil citadins. E dut chest, mentri che il triestin Odilo Globocnik al tornave a cjase cu la sô elegante divise nere des SS, fuart di vê bielzà organizât i cjamps di stermini di Sobibor e di Majdanek. Amì personâl di Himmler, al stave par screâ la Risiere di San Sabba a Triest. Cuintri chei partigjans de Cjargne i mucs a inviarin i Cosacs: 20.000 soldâts, compagnâts di 20.000 feminis, vecjos e fruts, 6.000 cjavai, cualchi desene di camêi. Cualchidun al à dite che no jerin farine di fâ ostiis. Ma in tancj cjargnei a disaran che a àn vaît cuant che i cosacs a son rivâts e ancje cuant che a son partîts: parcè che i puars e i disperâts a rivin simpri a capîsi, ae fin.
INMÒ SU PE MONT FURLANE_ Ma tal 1944 altris rus a zirin pe Cjargne e pal Friûl: a son i soldâts dal batalion Stalin, che a combatin cui partigjans garibaldins. Un di lôr, Denis, cjapitani de Armade Rosse, al mûr in combatiment a Clausêt. Il plevan nol vûl soterâlu tal cimitieri. Pietât cristiane. La sô lapide e je dongje dal mûr. Storiis che a àn il savôr dal romanç. Come chê di un altri rus, Kozjakin, premiât cul ordin di Lenin te vuere di Finlandie. Presonîr dai Mucs, al rive in Friûl insieme cui cosacs, al bandone la divise, al combat cui partigjans. Si inamore di une biele fantate di Ruvigne, che i darà doi fîs. Ma ae fin de vuere, Stalin al domande indaûr ducj i rus finîts in Europe. Par lui a son traditôrs. Consegnât tes mans de polizie politiche, Kozjakin nol tornarà mai plui. Lassant in Friûl cualchidun a spietâlu.
A CUANT LA NESTRE LIBERAZION?_Une vuere che non finìs. Tant che ai doi di Mai i Karstjäger des Waffen SS, ritirantsi, a fasin stragje di civîi a Vasinis. E la Italie e celebre la liberazion ai 25 di Avrîl! Vino di fâ cuintristorie? Lis feminis a vegnin svilidis ancje te zornade de liberazion. Che i oms de Resistence no volevin che a sfilassin a Udin, il prin di Mai, te place che e cjaparà il non di chê date, par pôre che si disès che la vuere partigjane e veve alc di pôc marziâl e mascli. A vegnin daûr gjonde e dolôr, ma ancje l’orôr dai svindics. E ce tantis frutis cui cjavei rasâts a son stadis umiliadis in place dome parcè che a vevin morosât cuntun soldât muc! Cuant che i mucs (i soldâts, intindìnsi, no lis SS!), i nemîs, a dividevin la marmelade, a mostravin la foto dai lôr fîs, mentri che i Inglês, i liberadôrs, a vevin miôr brusâ il mangjâ pluitost che dâlu ai fruts furlans. E a disevin di puartâ la democrazie. Une storie za sintude, ancje in chei dîs achì, ator pal mont, là che int in divise e bombarde, e umilie e e cope chei che e varès di difindi e di judâ. Tal non de Libertât. Vie i mucs e indenant chei altris: neris su la jeep, gome di mastiâ, sigarets americans, charleston e fox trot invezit di Lilì Marlene. E i oms che a tornin dai cjamps di presonie a son ducj come Vico, alpin di Glemone, tant smagrît e distrut che la mari no lu cognossarà, stant che i someave plui vecjo di jê. E al veve vincj agns. Mari fortunade però. Chê ritrate te foto de cuviertine e larà indenant a puartâ rosis sui crets par dute la sô vite, spietant.
ALPIN, JO MAME_ Par fortune che nô furlans o podìn svantâsi di vê vût i alpins, che no àn mai amade la vuere, stant che il so pês al è simpri colât soredut su la lôr gobe. Come che a àn dimostrât a Paluce, cuant che bielzà pronts par partî pe Russie, cjamâts plui dai lôr mui, plens di marum e di avilizion, a viodin passâ dongje di lôr une compagnie in cjamese nere, che ju sbelee, ju incite a sei contents di lâ a murî pe Patrie. Ur monte sù la fote, a chei alpins, e poiâ il russac e fracâju di pachis al è stât dut un. A saran simpri lôr a colâ te nêf di Nikolaewka, ai 26 di Zenâr dal 1943. In tancj a son stâts salvâts des feminis russis, che ur àn dât di mangjà, tes lôr izbes. Int dure, i alpins, braurose. La caserme “Italia”, a Tarvis, e sarà la ultime a rindisi ai mucs, daspò dai 8 di Setembar. Tresinte alpins cuintri dutis lis colonis todescjis intropadis a Arnoldstein. E ancjemò une volte e je une femine a judâju, la Gjigje Picech, centraliniste de stazion publiche dal paîs, che e manten lis comunicazions, fintremai ae rese, dopo un scombatiment durat sîs oris. La prime partigjane femine de Resistence!
LA REPUBLICHE LIBARE DI CJARGNE_ E dopo di jê, tantis altris feminis a decidaran di scombati par difindi la libertât dal lôr popul. Come chês che a àn operât te Libare Republiche de Cjargne, une esperience durade dal Lui al Dicembar dal 1944, cul so altissim profîl di civiltât, pe difese de dignitât dal om, dal libar pinsîr, de scuele publiche, de nature e dal ambient, de libertât di peraule, di pinsîr e di stampe. Pe abolizion de pene di muart. 2.500 chilometris cuadrâts di libertât jenfri Friûl e Venit, 90 mil citadins. E dut chest, mentri che il triestin Odilo Globocnik al tornave a cjase cu la sô elegante divise nere des SS, fuart di vê bielzà organizât i cjamps di stermini di Sobibor e di Majdanek. Amì personâl di Himmler, al stave par screâ la Risiere di San Sabba a Triest. Cuintri chei partigjans de Cjargne i mucs a inviarin i Cosacs: 20.000 soldâts, compagnâts di 20.000 feminis, vecjos e fruts, 6.000 cjavai, cualchi desene di camêi. Cualchidun al à dite che no jerin farine di fâ ostiis. Ma in tancj cjargnei a disaran che a àn vaît cuant che i cosacs a son rivâts e ancje cuant che a son partîts: parcè che i puars e i disperâts a rivin simpri a capîsi, ae fin.
INMÒ SU PE MONT FURLANE_ Ma tal 1944 altris rus a zirin pe Cjargne e pal Friûl: a son i soldâts dal batalion Stalin, che a combatin cui partigjans garibaldins. Un di lôr, Denis, cjapitani de Armade Rosse, al mûr in combatiment a Clausêt. Il plevan nol vûl soterâlu tal cimitieri. Pietât cristiane. La sô lapide e je dongje dal mûr. Storiis che a àn il savôr dal romanç. Come chê di un altri rus, Kozjakin, premiât cul ordin di Lenin te vuere di Finlandie. Presonîr dai Mucs, al rive in Friûl insieme cui cosacs, al bandone la divise, al combat cui partigjans. Si inamore di une biele fantate di Ruvigne, che i darà doi fîs. Ma ae fin de vuere, Stalin al domande indaûr ducj i rus finîts in Europe. Par lui a son traditôrs. Consegnât tes mans de polizie politiche, Kozjakin nol tornarà mai plui. Lassant in Friûl cualchidun a spietâlu.
A CUANT LA NESTRE LIBERAZION?_Une vuere che non finìs. Tant che ai doi di Mai i Karstjäger des Waffen SS, ritirantsi, a fasin stragje di civîi a Vasinis. E la Italie e celebre la liberazion ai 25 di Avrîl! Vino di fâ cuintristorie? Lis feminis a vegnin svilidis ancje te zornade de liberazion. Che i oms de Resistence no volevin che a sfilassin a Udin, il prin di Mai, te place che e cjaparà il non di chê date, par pôre che si disès che la vuere partigjane e veve alc di pôc marziâl e mascli. A vegnin daûr gjonde e dolôr, ma ancje l’orôr dai svindics. E ce tantis frutis cui cjavei rasâts a son stadis umiliadis in place dome parcè che a vevin morosât cuntun soldât muc! Cuant che i mucs (i soldâts, intindìnsi, no lis SS!), i nemîs, a dividevin la marmelade, a mostravin la foto dai lôr fîs, mentri che i Inglês, i liberadôrs, a vevin miôr brusâ il mangjâ pluitost che dâlu ai fruts furlans. E a disevin di puartâ la democrazie. Une storie za sintude, ancje in chei dîs achì, ator pal mont, là che int in divise e bombarde, e umilie e e cope chei che e varès di difindi e di judâ. Tal non de Libertât. Vie i mucs e indenant chei altris: neris su la jeep, gome di mastiâ, sigarets americans, charleston e fox trot invezit di Lilì Marlene. E i oms che a tornin dai cjamps di presonie a son ducj come Vico, alpin di Glemone, tant smagrît e distrut che la mari no lu cognossarà, stant che i someave plui vecjo di jê. E al veve vincj agns. Mari fortunade però. Chê ritrate te foto de cuviertine e larà indenant a puartâ rosis sui crets par dute la sô vite, spietant.
Angelo Floramo
Nessun commento:
Posta un commento